O loo agiga mai lipoti o taaloga lakapi i Iapani le taalo a se tasi o tama taaalo sa iai a le All Blacks o Ngani Laumape lea ua taalo nei mo le kalapu Iapani le Kobe Steelers.
O Laumape ua 29 tausaga ma e pei ona silafia sa taalo i le tulaga second five mo le All Blacks peitai e lei toe filifilia i le ‘au mo le Ipu o le lalolagi i le 2019 ma agai ai loa i lana konekarate i le kalapu i Farani i le 2021 a o lei see ane ai i le konekarate fou ua iai nei ma le kalapu a Iapani.
Ua faailoa e le aufaasalalau e 10 sikoa na maua a Laumape i ana taaloga e 22 i le kalapu a Farani ae o le taaloga talu ai nei a lana kalapu lea i Iapani, e tolu ana sikoa na maua ai ma manumalo ai lana ‘au i le taamilosaga lona tolu o loo faagasolo nei i le lakapi i totonu o le atunuu o Iapani.
A o tau faamautu ai tulaga o le All Blacks mo taamilosaga o loo loma e manatu nisi e pei sa tatau ona toe silasila faiaoga ma le au fai filifiliga a le All Blacks pe le toe ono aofia ai ma Laumape i le tapena atu mo le Ipu o le lalolagi i le tausaga nei.
