Na lipotia i le 9Sports i le aso ananafi se lui a le faiaoga o le Toa Samoa Matt Parish ua faia ia Ausetalia e taulai ai le latou silasila i le fulupeki talavou o Joseph Suaalii i le taaloga i le faaiuga o le vaiaso nei.
O Suaalii ua na o le 19 tausaga le matua ua ta’ua i le lipoti o le pepe o le taamilosaga ma o se tasi o tama taalo aupito laititi ua iai i se taaloga o le Finals o le Ipu o le lalolagi.
O loo taumatemate le au maimoa atonu o le a test e le Kangaroos le tomai o le alii talavou i polo kiki maualuga ma kiki kalapa, peitai fai mai le faiaoga a le Toa, talosia ia manuia taumafaiga ia a Ausetalia ona o le a talitali lelei mai lava e Suaalii.
Faailoa e Parish i le faatalanoaga i le Wide World of Sports, o Suaalii ua faasolo pea ina lelei lana taalo i le mae’a o taaloga taitasi ma o se tama taalo tulaga ese lona taumafai.
O upu faaiu a le faiaoga i lana faatalanoaga lea o loo manunua tama ae o le a taumafai pea ma o tama taaalo e mitamita e avea ma sui o le latou atunuu ma o latou aiga.
