E le’i avea le Aso Sapati ma ‘alofaga e tumutumu ai le to’atele o tagatānuu Samoa ma le ‘aulagolago mo ‘au a le atunuu le Fetu ma le Toa Samoa; i le amatalia ai o taaloga o le su’ega siamupini i le taaloga lakapi liki a le Pasefika, le (Pacific Championship), e pei ona iloilo ai ma le ‘au malosi mai Aotearoa nei le Kiwi Ferns a tama’ita’i ma le Kiwis o alii i le malae taalo a le Go Media Stadium.
FETU SAMOA
Na malosi le amataga a le ‘au a le Fetu Samoa e pei ona molimauina ai le mua’i tau ‘ai o le ‘au i toe 12 o minute ma nai sekone o le ‘afa muamua lea na sikoa ai le tama’ita’i o Shalom Sauaso, e 18 tausaga le matua.
O le 20 o minute i le ‘afa muamua na toe sikoa ai le numera 3 a le Feta Samoa, le tama’ita’i o Savina Masaga i le pito i tai o le malae mai le pasiga na faatino mai le ogatotonu o le malae.
O le isi sikoa mata’ina o le taaloga na molimauina ai le faasalavei ai e le uigi a le ‘au, Destiny Mino-Sinapati le polo a le ‘au a le Ferns mai le latou itu, ma momo’e ai i le laina sikoa.
O le vaega mata’utia o lea sikoa o le mamao o le tuli ai e lea tama’ita’i o le laina sikoa, e pei ona faamauina e 90 mita na tamo’e mai ai Destiny mai le latou itu aga’i atu i le laina sikoa a le Fetū ma maua ai ‘ai a le atunuu e 14 i le le’i tau ‘ai a le Ferns.
Na toe faate’ia le ‘aumatamata i le toe maua ai o se isi sikoa a le ‘au mai le numera 12 a le ‘au ma oo ai ‘ai i le 20 ma kiki o sikoa e lua na ova mai le tama’ita’i o Pauline Pilia’e-Rasabale mai le fā o kiki, a o le’i tāina le ‘afa o le taaloga a ‘au e lua.
E ui i se mata’ina o taumafaiga a tama’ita’i ae na vaaia le malosi o le sau a le Ferns i le i le sosoo ai o sikoa a e amata ona tau ‘ai ai Niu Sila i le faato’ā 9 minute i le ‘afa lona lua, e pei ona maua mai i tama’ita’i Shanice Parker, Ashleigh Quinlan Alexis Tauaneai, ma le tama’ita’i o Mele Hufanga.
Na tutusa ‘ai a ‘au peita’i na sili le Ferns ina ua ova le kiki i le pou a le tama’ita’i o Patricia Maliepo, e pei ona manuia uma ana a’a i le pou e 3 mai le 4 o ana taumafaiga.
E 22 ‘ai na manumālō ai le Ferns i le 20 ‘ai o le ‘au a le Fetu Samoa.
TOA SAMOA
I le ‘au a le Toa Samoa, na molimauina le malosi o ‘au uma lua i le ‘afa muamua, e ui i le ‘ai silia o le Kiwis nai lo o le Toa Samoa i le ‘afa muamua.
Na mua’i tau ‘ai le Kiwis ina ua sikoa le alii o McLean i le toe o nai sekone i le 10 o minute o le ‘afa muamua.
E le’i faapea na avea le tetele o tino o Josh Papalii ma le Roger Tuivasa-Sheck e taofi ai le alii lava lea o Casey McLean ma sikoa ai mo le lona 2 o taimi i le 21 o minute o le taaloga.
Ae na vaaia le tulituli mai ai e le Toa o le ‘au malosi a le Kiwi ina ua maua le sikoa a le alii o Deine Mariner i le 26 minute o le ‘afa muamua.
Na toe maua le isi sikoa mai le alii o Simi Sasagi, mai se kiki mata’utia a le alii o Chanel Harris-Tavita, e pei ona molimauina le leai o se tama taalo a le Kiwi na iai i le laina pito i tua i se sefe a le latou tama o Charnze Nicoll-Klokstad.
Na toe maua le isi sikoa a le Toa mai le alii o Murray Taulagi, lea na tutusa ai loa ‘ai o le taaloga i le ‘afa mulimuli.
E ui lava ina taumafai atu le ‘au ae na malosi lava le Kiwis i le latou taaloga, e pei ona manumālō ai i ‘ai e 24 i le 18 o ‘ai a le Toa Samoa.
O le a malaga le ‘au i Ausetalia mo le vaga lona lua o le taamilosaga e pei o le a taaalo ai le Fetu ma le ‘au a le Jilaroos ma le Toa o le a iloilo ma le ‘au a le Matemaa Tonga.
