E ui ua malolo le taumafai o le alii Ausetalia o Nick Kyrios i le la fetauiga ma Novak Djokovich mo le siamupini o le taamilosaga tele i Wimbledon peitai e manatu nisi o le aumaimoa o talasua ma talanoaga a alii taaalo i le mae’a o le taaloga o se tasi lea o itu tāua o le faai’uga o lea taamilosaga. 

To’atele na o latou faatalitalia le fetauiga lea ona ua silafia lelei le ituaiga tagata taalo e iai le alii Ausetalia o Kyrios aemaise uiga faaaliga i luga o le malae aemaise foi le talitali mai a le alii ta’uta’ua i le lalolagi i le taaloga, Novak Djokovich peitai ua faailoa i lipoti e le’i mafaufauina e le to’atele le tulaga na iai faamatalaga a i laua ia ua maitauina ai le maualuga o le faaaloalo o le isi i le isi e ui i feupua’iga masani i taimi o taaloga. 

Fai mai Djokovich o Kyrios o se tasi o tagata aupito lelei o le taaloga i le lalolagi. Faailoa foi e Kyrios lana faamalo ia Djokovich ma ia faaalia ai e ui e lē lelei le la va i le tele o taimi ae o le taimi na matua’i mana’omia ai e Djokovich le lagolago, sa ia tulai ai mo ia.