O se tausi soifua mai Canberra na faamalolo ona o lona faasoa atu o faamatalaga faalilolilo i se iuni, ua tuuina iai se taui e ui fai mai le vaega sa faigaluega ai o loo iai mafuaaga tatau mo le faamalolo o lea tina.

O Carol Sandland na ia ave le Canberra Health Services i le faamasinoga ina ua faamalolo o ia ma nisi o le aufaigaluega i le amataga o le tausaga nei.

Na ia ioeina lona tuuina atu o imeli o loo aofia ai faamaumauga o gasegase mai lana imeli o le galuega fai mai a ia sa lafo agai i lana imeli i le fale e faamae’a ai ana galuega ma sa ia faasoa ia faamatalaga i le iuni ona sa ia lagona o le pulega a le falemai i lea taimi sa leai ni a latou galuega e fesoasoani ai i popolega o le aufaigaluega mo lo latou saogalemu.

I le iuga la o le suesuega a le Fair Work Commission sa faia i le mataupu lea ua iloa ai sa lē tatau ona faamalolo Carol e ui sa iai le mafuaaga tatau.

Na iloa foi i le suesuega sa lē tatau ona faatopelau le faaiuga e faamalolo lea tina ma ua faatonu ai le Canberra Health Services e toe totogi ia Carol le $5,400.00 o le tupe sa tatau ona ia maua pe ana toe faafaigaluega pea mo le isi fā vaiaso a o iloilo toto’a le mataupu na aafia ai.