Ua malo le finau a le Grounded Kiwis I lana finau na tuuina atu I le faamasinoga faasaga I MIQ poo nofoaga faanofoesea
O le masina o Fepuari na oo ai le kulupu ua taua o le Grounded Kiwis o loo tutu mo tagata Kiwi na poloka I atunuu mamao I taimi o le Koviti ona o le system lea sa faaaoga e saili mai ai potu I nofoaga faanofoesea, ma o lea sa taulai le finau a lea kulupu mai le masina o Setema e oo mai I le aso 17 o Tesema o le tausaga faatoa uma atu
E le o sa’o I le Grounded Kiwis le system na moomia ai le voucher ma mautinoa ai ua maua le potu pei ona iai le online lobby system, aemaise o le auala na iloilo ai e sui o le pulega talosaga agavaa mo emergency applications e maua ai avanoa I nofoaga faanofoesea
Mai le faamasinoga maualuga ananafi, e le I tonu le system pe a faatusa I le taotaomia ai o aia tatau e tatau ai ona toe foi mai tagata Kiwi, aemaise e foliga mai e le o se system mautu ma e oo foi I le iloilo ma talia o talosaga e agavaa I lalo o emergency, e ono iai le tulaga fesiligia
Ae I se tali a le minisita o le Koviti Chris Hipkins e tusa ma le faaiuga ua aumai, o lea lava sa taumafai le malo e puipui Niu Sila mai le ulufale mai o le faamai ma o loo vaavaai iai I le faaiuga a le faamasinoga
