Ua faalogoina se tala faanoanoa mai si tamaitai tineimu lea na faamanu’alia a o taumafai atu e tapē le afi na sasao ane i se warehouse i le itu i Saute o Brisbane, ua faailoa mai i le asō ua iu lava ina maliu mai ona manu’aga.
O si tamaitai e suafa ia Izabella Nash na maliu i le falemai ma faamaonia mai e le ofisa o le tineimu a Kuiniselani, o ia le isi o le au tineimu na aveina atu i le falemai ina ua aafia a o faatino o latou tiute o le taumafai lea e tapē le afi sa sasao ane i se warehouse i Slacks Creek i Kuiniselani lava i le taeaopo ananafi.
O loo faatino suesuega i le mafuaaga o le aafia o le tamaitai ma o loo lipotia atonu ua leai se okesene e mānava ai ma iu ai ina matapogia.
Talu mai le 2014 sa auauna ai lea tamaitai o se tineimu ma sa maualuga le silasila iai a le aufaigaluega o se tagata faigaluega lelei.
O le isi o loo taofia pea i le falemai o loo tigaina foi o Lia Drew ma o loo faaauau le suesuega.
