Ua lua ai ī faalavelave tau taavale o le “Hit and Run” e aafia ai tamaitai aoga ua tulai mai le amataga o lenei tausaga.

O le amataga o le vaiaso nei na uma ai le ola o se tamaititi 14 tasuaga o Vaiusu ina ua so’a e se taavale ao taumafai ai o ia e kolosi le auala.

O lenei tamaititi e nofo lava i Vaiusu ma o le toe foi ai o ia i lona fale mai le faleoloa lea na tulai ai loa lea faalavelave.

E 50 tausaga o se tama ua i le ofisa nei o leoleo ma o le a molia i moliaga talafeagai.

Mai ripoti a le Samoa Global na taua ai e nisi o molimau e lanu efuefu le taavale na lavea ai lea tamaititi ma  na tū muamua ina ua tupu le faalavelave ae te’i ua toe alu le taavale.

O lea tamaititi e aoga i le Kolisi o Faleata ma o lona tausaga muamua lenei i kolisi maualuluga

O loo faaauau nei suesuega a leoleo i lea mataupu.

E pei ona silafia o le lua vaiaso talu ai na uma ai foi le ola se tamaititi aoga 19 tausaga ona o se faalavelave tau taavale i Vaitele ma e oo mai le taimi nei o loo sailia pea le avetaavale lea na lavea ai lea alii aoga.