Ua faamaonia mai nei le faatautaia ai e sui o le vaega iloilo a le Auaunaga o Falepuipui le maliu ai o se tamā e 75 tausaga le matua o le soifua, i totonu o le falepuipui i Kalaiesitete.
Ta’ua e le Faatonu Sili o le auaunaga i se faamatalaga na tuuina mai i le leitio faasalalau a le RNZ, na faamauina ai na maliu lea tagata matua i le falepuipui i le Aso Faraile ma o loo maitauina ma masalomia na maliu o ia ona o ni aafiaga i lona soifua mālōlōina.
E tusa ai ma lipoti, e le’i tali le auaunaga i le tele o fesili a le ofisa faasalalau, ona e faapea e lē mafai ona tuuina mai ni faamaumauga i vaega uma e tusa ai ma le maliu o lenei tagata, peita’i ua tuuina atu le tino mo su’esu’ega a le pule o maliu.
Ua tuuina atu nei faamaisega a le auaunaga i aiga ma uo o lē ua maliu, ma ua faamaonia mai foi le tuuina atu o fesoasoani i alii o loo iai i le itu poo le unit na iai lea tagata matua.
O fesoasoani e aofia ai faifeau ma tagata o aganuu e tali atu i ni aafiaga ua feagai ma i latou e tusa ai ma le maliu o lea tagata.
Faamaonia mai e Harrex, soo se maliu lava e alia’e a o iai tagata i lalo o le latou vaavaaiga e faatino su’esu’ega faapitoa, e pei ona faatino e le pule o maliu ina ia iloilo lelei le māfua’aga ua fano ai le ola o se tagata; faapea foi le faatino ai o se iloiloga a sui tuto’atasi o le auaunaga (Corrections Inspectorate).
Puna o Faamatalaga: https://www.rnz.co.nz/news/national/576391/man-dies-at-christchurch-prison
