Ua faamaonia ua iai le isi talavou ua maliu mai le gasegase o le meningococcal ma ua atoa ai le toatolu o tagata ua maliliu i le faamai i Niu Sa Uelese i le tausaga nei. 

O le faaaliga mai le matagaluega o le soifua maloloina i le vaiaso nei ua faamautu ai lea tulaga ae lei leva atu nei ona fautuaina e sui o le soifua maloloina i le ACT tagata sa iai i se faaaliga musika le Split milk music festival ina ia faia siaki ona sa lipotia le iai o se tasi sa aafia i lea gasegase i le koneseti.

Ua faaoo atu faamaisega a le matagaluega i le aiga o le talavou ua aafia ae i le taimi nei mai lava i le amataga o le tausaga e toa 29 i latou na aafia i le gasegase lea ma o le meningococcal e fai lava si ogaoga o ona aafiaga pe afai e le togafitia.

O i latou e aupito aafia vave ai o tamaiti i lalo o le tai 5 tausaga ma i latou ei le va o le 15-25 tausaga le matutua.