O le po anapo na maliu se alii e iai le masalosaloga sa taumafai e gaoi uaea o le copper mai se power transformer i Kalaiesetete
Na ta’ua e le Christchurch Metro Area Commander Superintendent, Lane Todd, e tusa o le 12am i le vaveao anapo na alu ane ai se avea’i i se afi o loo sasao ane i se transformer i Brooker Avenue i Burwood.
Na maua atu iai se tagata i ni manu’aga ogaoga, ma na maliu ai lava i le nofoaga o le faalavelave.
Ta’ua e Todd o loo faia su’esu’ega, ae foliga mai o lea tagata sa taumafai e aveese le copper mai le transformer.
E le’i mafai e auaunaga mo faalavelave faafuase’i ona vave oo atu e aveese mai lea tagata talu ai sa ola pea le transformer.
Sa tatau ona tapē le eletise mai le transformer ma e tusa ma le 700 fale o aiga na aafia ai, a o le’i faatinoa se fesoasoani muamua, peita’i e le’i toe mafai ai ona faasao mai le ola o lea tagata.
Na ta’ua e Todd le faigatā o lea faalavelave mo i latou sa auai atu e faatino le fesoasoani lavea’i.
E tele tausaga o pagatia pea Kalaiesetete i le faafitauli lenei o le gaoi e tagata o le copper ma taumafai e faaleaga uaea eletise, ma sa alu atu foi ni lapata’iga a leoleo ina ua tula’i mai ni faalavelave faapena i totonu o le lua vaiaso i le masina o Me i le 2024.
I lena taimi, na taumafai le augaoi i Kalaiesetete i le pitonuu o Waltham, e tatipi se’i tulou o uaea eletise i le po ma tuu ai uaea eletise o loo ola pea, e aofia ai se faalavelave faapea i fafo ane o se a’oga amata i Phillip St.
Sa tula’i mai foi nisi gaoiga faapena i le tausaga talu ai, ma faaauau ai pea lapata’iga a leoleo i le mata’utia o i’uga e oo iai e lē gata i ni manu’aga ogaoga ae i’u lava i le maliu ona o le taumafai e faaleaga uaea eletise ma gaoi le copper.
O loo fautuaina le mamalu lautele, ia vili vave leoleo i le 111 pe a masalomia ni gaioiga faapea o loo faia i nofoaga o le eletise e pei o poumōlī ma transformer.
Puna o Faamatalaga: https://www.1news.co.nz/2026/03/24/man-dies-trying-to-take-copper-from-power-transformer-in-christchurch/
