A o tali atu le to’atele o sui o faalavelave tutupu faafuase’i i aafiaga faalenatura, ae e lē o mālōlō ai foi le tali atu i nisi o matāupu ua aafia ai soifua ma ola o tagata i totonu o Aukilani, e pei ona lipotia mai le maliu ai o se avepasika (motorcyclist) ina ua feto’ai ma se loli lapo’a.
I faamatalaga a leoleo mai le poo le kuata e te’a ai le 11 i le po na o latou māua ai le saoasaoa tele o le alu a le pasika aga’i i le itu i Saute o le Motorway e lata ane i Ōtara.
Ta’ua e Superintendent Shanan Gray, na taumafai atu leoleo e ala i le faia iai o faailoilo i lea avepasika ina ia tū, peita’i e le’i tū ae peisea’i na atili ai le saoasaoa o le alu a le pasika.
Ae faamatala a o le’i tupu lea tulaga sa vaaia ai e leoleo se aveloli o talo atu ma taumafai e taofi i latou, talu ai ua feto’ai se tagata ma lana pasika i lana loli, ma le māua atu e leoleo, o le pasika lea na o latou tuliloaina.
Faamauina e fai lava sina tugā o manu’aga o le alii avepasika ma na maliu ai lava o ia i le nofoaga na tula’i ai le lavea.
Na tapunia auala e aga’i mai i le itu i Saute o le Highway 1 a o faasolo iloiloga ma na faato’ā toe tatala i le Aso Faraile i le itula e 5 i le vaveao.
O loo tālia le faailoa mai o le suafa o lē ua aafia.
Puna o Faamatalaga:
