O se tagata Ausetalia na faasaoina mai i se faalavelave tau taavale i se taimi ua sola, o ia lea ua lipotia mai ua maliu a o ia a’eina le mauga tele o Everest.
Ua ta’ua i lipoti a le 9News i le asō o Jason Kennison 40 tausaga le matua o ia le tagata ua atoa iai le toa 10 o ē ua maliliu i luga o le mauga lea, fai mai se faamatalaga o lē ua maliu o le mining engineer na feagai ma faaletonu a o loo iai le tusa ma le 8000 mita i luga o le mauga, o le vaega tonu lea e faaigoa e nisi o le au aemauga o le death zone.
O lipoti i le asō i lenei faalavelave ua ta’ua ai sa feagai Kennison ma faaletonu i le maualuga na iai i le mauga ma toe aveina ifo ai i se vaega e maualalo teisi ifo e nisi o tagata e faigaluega ai i le nofoaga peitai na vaaia pea tulaga faaletonu ona sa faaitiitia foi le sapalai o le okesene i lea vaega ona o le malolosi o savili.
O le faalavelave tau taavale na aafia ai Kennison i le 2006 na telē sona aafiaga ia te ia ma e umi se taimi sa tau toe faaa’oa’o ai e savali.
O lona a’ea o le mauga o Everesi ina ia sailia ni seleni mo le Spinal Cord injuries Australia e fesoasoani ai i isi tagata o loo aafia i ia ituaiga aafiaga.
Fai mai lipoti o le vaega o le mauga lea e faaigoa o le death zone e matuai aafia ai māmā ma le fai’ai ona o le tau lē lava o le okesene ona o le maualuga tele.
O loo tālia se faamatalaga mai le matagaluega o le va i fafo a Ausetalia e tusa ai o lenei faalavelave.
