O le vaiaso talu ai na māua ai i lipoti se aiga Samoa i Aukilani ua masalomia le aafia o se tasi o le fanau e silia ma le 20 tausaga le matua ma uma ai lava lona ola i le tuanai o aso e lima o taofia i le falemai.
E faapea faamatalaga na inuina e lenei alii talavou le apa pia o le Honey Bear, ma mulimuli ane ai oso faama’i malosi ma matapogia ai i le Aso Tofi 2 o Mati. Na faanatinati atu i le falemai ma fai iai suesuega a alii ma tamaitai fomai.
Na o latou faailoa o loo iai le vailaau o le methamphetamine poo le aisa i totonu o totoga o lea talavou ma sa o latou faamaonia ai na ia inuina le apa pia (Honey Bear).
E le o mafai ona faailoa i le taimi nei le igoa o lē ua maliu ona o loo tālia le faaiuga mai le pule o maliu (coroner) ae o lea ua faamalosia ai nei lapataiga mo le saogalemu o tagata lautele.
O lea ua sau le lapataiga mai leoleo i Aukilani e faatatau i le apa pia lenei ma ua suesueina ai nei foi methamphetamine ua aumai i totonu o Niu Sila e faaaogaina ai apa pia.
E iai le talitonuga e iai nisi o nei apa pia o le Honey Bear Beer o loo iai le pia sa’o a o nisi apa pia o loo filogia ma le meth.
O loo iai foi le talitonuga o sui o le ofisa e ono lei faatauina i tua i faleoloa poo faatauga e faia i luga o le initaneti, peitai e ono iai se vaega o le uta na aumai ai apa pia nei ua maua e nisi.
O le uta o apa pia nei o le Honey Bear House Beer o loo iai apa pia e tusa ma le 473ml le telē o le pia o loo iai, e lanumoana le apa o loo iai le ata o le bear ma upu o loo tusia i le lanu mumu.
Ua tuuina mai ai ma le talosaga e aua ne’i inuina ma ia vave faafesootai le ofisa o leoleo i le 105 poo le Crime Stoppers i le 0800 555 111.
