E tele moomooga alofa ma faamafanafanaga ua vaaia i luga o upega tafailagi mo le aiga o si alii e suafa ia Max Brito, le uigi mai le Ivory Coast lea na le toe mafai ona savali, paralyse i le ipu o le lalolagi i le lakapi i le 1995 i Aferika i Saute.
O Brito sa fesoasoani iai le alii lauiloa a Niu Sila Jonah Lomu a o lei maliu ae o le aso ananafi na faamaonia mai ai e le kalapu mai Farani sa taalo ai, e moni ua maliu Brito i le 54 tausaga o lona soifua i le taimi nei.
Faaleo foi le faanoanoa o le World Rugby ma faaoo ai faamaisega mo si ona aiga ma uo.
O le 27 tausaga o Brito na aafia ai i le taaloga ma Tonga lea o loo ta’ua na pue ai e le flanker a Tonga o Inoke Afeaki ma ave atu ai i le falemai i Pretoria i Aferika mo le faia o lona taotoga lea na aafia mai ai lava i lea taimi i ia manuaga.
Na faatau ese e Lomu le jersey All Blacks sa ia laeiina i le final lea e fesoasoani ai ia Brito ma maua ai se vaegatupe e tusa ma le $3400 NZ e faaopoopo i le tupe atoa o le tauofoga sa faia e fesoasoani ia Brito e $70,500 tala Niu Sila.
