E toatele tagata na manunua tigaina ae toatasi ua ma’umau le soifua i le faalavelave tau taavale matuia na tulai mai i Bay of Plenty.
E 5 ambulance, 4 helikopa ae ese ai taavale a nisi na vave ane e fesoasoani i le faalavelave lenei i le afiafi ananafi.
Mai le sooupu a St John, o tagata tigaina nei na ave isi i le falemai a Waikato ae toatasi na ave i le falemai i Aukilani, e ese ai le isi toatolu na auina atu i le falemai i Tauranga.
I faamaoniga mai leoleo e toatasi na uma ai lava lona soifua.
E oo mai i le taimi o tala fou e 17 tagata maliliu i luga o auala o lenei Kerisimasi ma le Tausaga Fou e tusa ma faamaumauga a le matagaluega o felauaiga.
