O se tina ua maliu ma tamaiti e toalua o loo manunua mai se afi na sasao ane i se fale i le itu i Matu i Sasae o Melepone i le po anapo.
O Maralee Drive i Moorolbark i Melepone na tupu ai lenei faalavelave fai mai na ulufale atu le fuimu ua sasao malosi le afi i le fale ma maua ai se tina o loo manua tigaina ma tamaiti e toalua ua matapogia.
Na togafitia le tina i lea nofoaga peitai e lei manuia galuega laveai ma maliu ai lava. O tamaiti e toalua o le teine ma le tama na aafia ina ua manavaina le asu mai le afi ma faavave atu ai i le falemai o loo taofia ai i le taimi nei faatasi ai ma lo la tama.
Fai mai le 9news e talitonu na o le tina ma tamaiti na iai i le fale i le taimi na sasao ane ai le afi ma o loo faagasolo nei le suesuega a leoleo i le faalavelave ma lona mafuaaga ae fai mai le au tusitala o loo vaaia tagata i le taimi nei o loo agai ese mai le fale lea na aafia ma loimata.
