E talavou si alii pailate ua faamaonia mai ua maliu ina ua lavea se vaalele laititi na malaga ane ai i le itu i Saute i Sisifo o Sini.
O le vaalele o le Cessna 172 o loo lesitala i se tasi o aoga mo le a’oina o avevaalele, na lavea i Brownlow Hill poo le tea o le tolu i le aoauli o le Aso Lulu, 3km mai le vaega na tuuvaa ese ai le vaalele i le malaevaalele i Camden.
Faailoa i lipoti a le 9News o le pailate, 16 tausaga le matua na talosaga e fia faatulaueleele le vaa ae faatoa tolu minute talu ona alu le malaga pe ā lea ma le 1500 feet le maualuga o le vaalele.
Fai mai lipoti e foliga na motusia fesootaiga a le pailate ma le tower i se taimi mulimuli ane ma faatoa iloa le faaletonu ina ua fesiligia atu e le isi pailate se tulaga ua iai lea vaalele ina ua vaaia le vaalele lea ua afaina.
Ua faamaonia mai la e leoleo o le pailate lea 16 tausaga e na o ia sa i luga o le vaalele, ua maliu.
