E toatasi ua maliu i le taeao nei ina ua fetoai lana taavale ma le ambulance.
O le latalata i le 4 i le vaveao analeila na tupu ai le faalavelave lenei i Tirau Rd (State Highway 1) e latalata i Cambridge ma e faapea na maliu ai lava le avetaavale i lea nofoaga, ae na avatu faavave le avetaavale o le ambulance a St John i le falemai i Waikato, ae o le isi tagata faigaluega sa iai i le ambulance sa manu’a mitimiti.
O le uluai lipoti na sau o lenei faalavelave mai leoleo na ta’ua ai faapea, na so’a atu e le taavale le pito i tua o le ambulance, ae na ta’ua e le Highway Patrol Sergeant, o Matthew Crossan, ina ua taunuu atu i le nofoaga o le faalavelave na iloa ai, e foliga na matuā fetoai lelei taavale e lua.
O le itu e faafetaia ai, e lei iai se gasegase i totonu o le ambulance i le taimi o le faalavelave, ma o loo suesue nei le mafuaaga o lenei faalavelave matuia ua ma’umau ai lenei soifua.
