E 45 tausaga le matua o se tamā na maliu i se faalavelave i le Aso Toonai na te’a nei, a o lumanai le Aso Sa o Tamā i Samoa ma o loo faia iai su’esu’ega a leoleo.
Ua faailoa mai e le Komesina o leoleo le susuga Auapaau Logoitino Filipo, o le faamatalaga ua tuuina atu i leoleo o loo ta’ua ai o se galuega na alu i le vaomatua i tuāmaota o le afioaga o Lalomauga o se taga laau na tupu ai le faalavelave ma maliu ai le tamā, ina ua palasi iai se laau.
E lē o iloa tonu pe na faapefea ona tupu lea tulaga ae o se faalavelave tugā na tulai mai i le taimi o loo tapena le atunuu i le aso faapitoa mo tamā uma o Samoa. O isi lipoti o le faai’uga o le vaiaso ma le aso mālōlō i le Aso Gafua ua faaalia e le Komesina, e iai tagata ma avetaavale sa loka ona o le tagofia o le avamalosi ma nai faalavelave tau taavale sa tutupu i lea taimi.
O loo iai foi se faalavelave na faatama’ia ai i se mu se maota tuufua o se aiga i Matautu i Apia i le taeao o le Aso Lua, ma o loo faia iai sailiiliga a leoleo ma le vaega o le tineimu i le mafuaaga.
