O Talavini Saunoa o Samata i Savaii o se atalii e lona lua i le fanau e to’afitu, ua faaipoipo ma e to’afā ona alo.
O le aso 12 o le masina o Setema o le tausaga nei o le taimi mulimuli lea na talanoa atu ai le tinā o Lagafuaina Taupaolo Faasavalu i lona atalii a o iai i galuega faavaitaimi i Niu Sila.
Peita’i o se tala faanoanoa ua faate’ia ai le tinā ina ua logoina e le sooupu o galuega faavaitaimi, o lona alo ua fano le soifua i se faalavelave na mū ai le fale sa faamautū ai.
Faaalia e le tinā o Lagafuaina ua faailoa atu o loo faia su’esu’ega a leoleo i le māfua’aga o le mu ae na tupu le faalavelave e na o lona atalii sa iai i le fale, o isi tagata o le latou ‘aupiki ua toe foi mai i Samoa ma lo latou ta’ita’i.
O se talanoaga ma le tinā mafatia o Lagafuaina e tusa o le faalavelave ua maliu ai se tasi o ona alo e to’afitu, a o iai i Niu Sila i galuega faavaitaimi.
Faaalia e le tinā, o faato’aga apu i Motueka sa galue ai le atalii ua fano le soifua.
O le taimi mulimuli na foi mai ai Talavini mai lana galuega faavaitaimi na faaalia e lona tinā, sa ia faatau ai le taavale mo lona aiga.
Ua faatolu ona malaga o ia i nei galuega i Niu Sila.
O le Aso Sa na te’a nei na tupu ai le faalavelave i le aafia i le mu o le fale sa faamautū ai le atalii ua maliu.
Tau ina ia faamaise le agaga faamafanafana o le Atua i mātua, o aiga, o le to’alua ma le fanau ona o le tala faavauvau ua motusia faafuase’i ai le mafutaga i le ola nei.
Ua 27 tausaga o le soifua o Talavini Saunoa.
