Ua lipotia o le tama tama lava a se ulugalii na maua ua maliliu i totonu o le la fale’aiga i Cambridge Park, ua molia e leoleo i le fasioti tagata ma feta’ua’ina sa ia tatui se’i tulou nai ona mātua i le Aso Toonai na te’a nei.
Fai mai le 7News o si ulugalii lea e ana le fale burger i Cambridge Park ae maua atu ua maliliu ai i totonu poo le te’a o le 9 i le taeao o le Aso Toonai na te’a nei.
O le ulugalii e 69 ma le 68 tausaga le matutua na maua atu i lea nofoaga e sui o le latou aiga i le Buzzy Bee Burger House ma ua faamaonia mai e leoleo e fai si ogaoga o manu’aga e foliga na tatui e se tagata.
O le la tama tama e 31 tausaga o Allan Chiem na pu’e e leoleo i le vaveao ananafi mai Canley Heights ma ave ai i le ofisa o leoleo.
Ua 30 tausaga o umia e si ulugalii le la pisinisi ma sa faigaluega ai ma lē ua molia.
Na lolofi atu nai tagata faatau masani a le pisinisi aemaise uo ma aiga o si ulugalii ua maliliu e faaoo faamaisega ma alofa’aga mo si ulugalii faipisinisi.
O ananafi na tula’i ai i le faamasinoga i Parramatta lē ua molia ma e le’i talosaga e tatala ia i tua peitai na faailoa e lana loia o le a silasila i se talosaga faapea pe a toe tula’i i luma o le faamasinoga i le tausaga fou.
O loo faaauau le su’esu’ega.
Puna o Faamatalaga: https://7news.com.au/news/cause-of-death-revealed-after-couple-slain-at-cambridge-park-burger-shop–c-16942566
