O loo galulue nei leoleo ma isi ile aveesea mai o tino maliliu o se tama ma si ona atalii lea na aafia ile sologa eleele I le Blue Mountains ile aso ananafi ao agai atu se latou savaliga I lea pito o Niu Sau Uelese.
Faamaonia mai e leoleo o se aiga e toalima na agai mai mai le United Kingdom mo sa latou tafaoga I Ausetalia ma sa alu se savaliga I le blue mountains ae lavevea ai I le sologa eleele ma maa na pauu ane i lea taimi.
Fai mai le SBS e 9 tausaga o le tamaititi ma si ona tama e 49 tausaga na maliliu ai lava I lea nofoaga I Wentworth Pass ae o le tina e 50 tausaga ma leisi tamaititi 14 tausaga o loo tigaina I le falemai.
O le teineititi 15 tausaga e atoa iai le toalima o si aiga lea, sa togafitia foi ma o loo manuia. O loo faaauau foi ma suesuega pe sa tatau ona le tatalaina lea nofoaga mo savaliga a le lautele aemaise ona o lea faatoa maea lologa na aafia ai le setete.
