7 tagata maliliu ona o le faalavelave tautaavale na tulai mai i luga o le State Highway 1 i Saute o Picton pe tusa o le ‘afa o le fitu o le taeao ananafi.
O se tasi lenei o faalavelave matuiā toe ua to’atele tagata maliliu i le talafaasolopito o faalavelave i luga o auala a Niu Sila. Lipotia e le Herald o le van na malaga atu ai le to’aiva, ma e faapea ua ia kolosia le laina ogatotonu o le auala ma feto’ai ai loa ma le loli la’uoloa.
O le isi to’alua o le pasese a le van na auina atu i le falema’i i Ueligitone i manu’aga tugā. Ae mo le aveloli e na o nai manu’aga mitimiti, ma o le loli a le kamupani a le Big Chill Distribution.
O loo su’esu’e pea nei le mafuaaga o le faalavelave ma o le a vaavaai foi i le saogalemu o lea auala. Mai leoleo ua toe faamanatu ai e pei o le emo o le mata le vave aveesea o i latou nei ona o le faalavelave, ma na faafetaia ai foi e le ofisa tagata ese na lata ane na vave ane ma taumafai e fesoasoani.
A faitau faatasi faalavelave tau taavale o lenei tausaga e aofia ai ma le faalavelave lenei, ua oo ai i le 184 tagata Niu Sila maliliu i luga o le auala, tusa lea ua 27 ua sili atu ai na i lo piriota lenei o le tausaga ua alu.
