Ua fausia nei se maliega a ta’ita’i o Malo o le Pasefika e aofia ai ma Samoa e felafoa’i le tofiga o le faauluuluga o le Ofisa tutotonu o galuega a malo o le Pasefika o loo i Suva i Fiti, ina ua mae’a le lua aso sa fono ai ta’ita’i e pei ona sa auai ma le Palemia o Samoa.
O le tausaga na te’a nei na aliali mai ai i fafo i se tulaga lautele le faamata’u a ta’ita’i o Malo Maikoronesia e pei o Palau, Nauru, le Atu Malesala, Kilipati ma le FSM poo le Federated States of Micronesia i le faamaamulu ma lē toe avea ma sui o Malo o le Pasefika, ina ua lē manumalo lo latou sui i le palota mo se faauluuluga o le ofisa o le Forum o loo i Fiti.
Na mafua lea tulaga ina ua lagolago e Fiti le filifilia o le sui mai atunuu Polenisia o lē sa avea ma Palemia o le Malo o le Atu Kuki. O lea ua malilie nei ta’ita’i o Malo o le isi nofoaiga e lima tausaga i le tofiga o le Failautusi poo le faauluuluga o le ofisa o Malo o le Pasefika o le a see atu i se sui o atunuu Maikoronesia.
O lea faai’uga autasi ua faaalia ai e le tamaitai Palemia o Samoa le afioga Fiame Naomi Mataafa, ua mafai ona finagalo autasi iai ta’ita’i ina ua mae’a le fonotaga i le Aso Gafua ma le Aso Lua o le vaiaso nei.
