Ua tauave e le sui Palemia le afioga Tuala Tevaga Iosefo Ponifasio, le taitaiga o le Malo ma le atunuu mo ni vaiaso, a o toesea le tamaitai Palemia le afioga Fiame Naomi Mataafa, i le faamoemoe e auai i le fono masani faaletausaga a Taitai o Malo Aufaatasi o loo usuia i le nofoaga tutotonu o lea faalapotopotoga tele a le lalolagi i le aai o Niu Ioka i Amerika.

O le mae’a o le tele o polokalame o faafiafiaga o le 60 tausaga o le Tutoatasi, na tuuvaa ese ai ma le atunuu le taitai o le Malo ma lana aumalaga mo lea faatasiga taua a taitai o Malo o le lalolagi.

O le fono muamua lea a Malo Aufaatasi ua auai le afioga i le Sa’o Faapito i lona tuua o le atunuu ina ua toe tatala tuaoi faavaomalo ua avanoa ai ona feiloai ma faafesagai taitai o Malo i le nofoaga tutotonu o Malo Aufaatasi.

O le fono i le tausaga na tea nei o le toatele o taitai sa auai i le faaaoga o auala o fesootaiga faaonapo nei, ae o le tausaga nei ua matala tuaoi i tulaga masani ua mafai ona malaga ma auai.

O nisi o mataupu autu o le fonotaga o le tausaga nei, o suiga tetele o le tau ua molimauina le matua aafia ai o nisi o atunuu o le lalolagi e le gata i atunuu e malolosi ma vaivai tamaoaiga ae faapena foi ona soalaupule ai ma aafiaga ogaoga ma maaleale o tamaoaiga o atunuu ona o le faamai Koviti-19.

O le tasi o mataupu o le a agai iai finagalo o taitai o Malo Aufaatasi o le sii taua o Rusia i le atunuu o Ukraine ma aafiaga ogaoga ua fetaiai ai ma Malo i le siitia o le tau o suauu ma penisini, ma mafua ai ona lele ane i luga maualuga le tau o le soifuaga.

O le aso 28 ma le 29 o le masina nei pe a mae’a lea faatasiga tele, o le a auai atu ai le tamaitai Palemia o Samoa i le feiloaiga a le Peresetene o Amerika o Joe Biden ma taitai o Malo o le Pasefika e pei ona iai se valaaulia a le taitai o lea Malo malosi e le gata i lona tulaga faafitafita, ae faapea foi i lona tamaoaiga.