E lua au tapolo mai Amerika Samoa, tasi mai Aukilani Niu Sila ma le 10 au i Samoa o le a saili ai le kalapu tapolo numera tasi o le a avea ma siamupini o le lua ai lenei o tausaga talu ona faia lea taamilosaga.
O le auai mai o au mai fafo ua faaalia i se pepa o faamatalaga, ua mafua ona o se lui a le Minisita o Aoga Taaloga ma Aganuu le afioga Seuula Ioane ina ua ia tatala le taamilosaga muamua i le tausaga na tea nei.
O le Tafesilafai ma le Good Times golf clubs mai Amerika Samoa ma le Marist Pro V Golf club mai Aukilani o le a malaga mai mo lea taamilosaga tapolo o le a faagasolo i le faaiuga o le vaiaso nei le Aso Faraile ma le Aso Toonai.
Talu ai le toatele o le au tata i le taamilosaga o le tausaga nei, ua faaalia e le Faatonu o le taamilosaga le afioga Taupau Carlton Chadwick, o le a vavae au tapolo e taaalo isi i le malae tapolo i Tuanaimato a o isi o le a taaalo i le malae i Fagalii.
O seleni o le a maua i le taamilosaga o le a fesoasoani ai i le taamilosaga tapolo a tupulaga laiti a le kalapu a le Malisi.
