O le Aso Sa i Samoa ae o le Aso Toonai lea i Hawaii le faaiuga o le vaiaso ua mavae atu nei, na taunuu manuia ai i le malaevaalele o Hilo le tasi o vaalele Twinotter a le kamupani vaalele o le Samoa Airways, i le faamoemoe e faaauau atu i le atunuu o Kanata o le a faia ai ni galuega e toe siaki ma faaleleia atoa ai mo ni masina.
E 15 itula e pei ona faailoa e le kamupani vaalele na malaga atu ai mai Samoa lea vaalele twinotter 5W FAW, ma taunuu ai i Hilo Airport lea sa toe utu ai le suauu o le vaa ma malolo ai foi pailate, ona toe tapena lea e faaauau le malaga i Santa Maria i Kalefonia i Amerika, malolo ai ona toe faaauau lea seia oo ina taunuu i Calgary i le atunuu o Kanata o le a faia ai galuega uma mo le toe siakiina ma faaleleia lea vaalele laititi.
O le faamoemoe o le Samoa Airways ia faamautu pea le tulaga saogalemu o ia vaalele mo malaga i le va o Samoa ma Amerika Samoa.
E iai le tasi o vaalele twinotter o le Samoa Airways o loo faaaogā mo ana malaga masani.
