O le toe tatala o le malaevaalele i Fagalii, ma mapuna mai ai i fafo atugaluga o le taitai o le Itu agai, ma le pulega o le kamupani vaalele o le Talofa Airways ma toe fesiligia le saogalemu o le faaaogāina o lea atina’e a le Malo, ua tali ai le Minisita o pulega o malaevaalele ma ia faailoa o Fagalii e fetaui lelei le umi o le malae ma vaalele laiti twin otter o le Samoa Airways, ae o le vaalele laititi o le kamupani o le Talofa Airways, e fetaui iai le malaevaalele i Faleolo.

E tatau i lea kamupani ona saili sona vaa e fetaui ma Fagalii e pei ona faailoa e le Minisita o Olo Fiti Vaai.

Faaalia foi e le Minisita i se pepa o faamatalaga na tuuina mai i le po anapo, o le toe fesiligia e le taitai o le Itu agai o le saogalemu o Fagalii ona o ni laau uumi, ma ni fale o fausaga faaonapo nei maualuluga aemaise o nisi o pou tau fesootaiga e lamatia ai le saogalemu o vaalele, o nisi ia o vaega sa iai i le taimi o faagaioia le malaevaalele i Fagalii a o avea ma Palemia.

Ua faailoa ai e le Minisita, a o lei toe tatalaina le malaevaalele sa faia se suesuega ma se isi sailiiliga a le vaega o le saogalemu e ta’ua o le PASO poo le Pacific Aviation Safety Office ma saga faamautu ai le saogalemu o le malaevaalele i Fagalii mo le toe faaaogāina.

O le lautele o le malae e taunuu ma oese ai vaalele o se tasi o fautuaga sa taoto a o faaaogā Fagalii i ni tausaga ua tuanai, peitai o lea faatoa faatino i le taimi ua toe tatala ai.

Talu mai le Aso Gafua na tea nei na tatala ai, o loo tālia pe taunuu fuafuaga mo le vaiaso nei e toe pisapisao ai leo o vaalele laiti twin otter o le Samoa Airways, e taunuu ma oese ma Fagalii.