O loo mafuta i Samoa mo le ulua’i taimi ta’ita’i ma sui auai o le Ekalesia Aso Fitu fou ua faaigoaina o le Valaau Mulimuli a le Atua, poo le God’s Final Call church e talanoa ai lona faavae ma faatulaga tofi o le pulega o le ekalesia e pei ona avea ai le faafeagaiga, susuga Ata Tavale Tanuvasa ma ta’ita’i aoao.
O lea Ekalesia Aso Fitu fou e tausi ma faamamalu pea le sapati e pa’ū i le Aso Toonai, ae o se ekalesia ua amata ona faagaioi e le susuga Ata Tavale Tanuvasa ma nisi o tagata tapua’i o aulotu sa avea ma sui o le Ekalesia Aso Fitu Samoa Tuto’atasi le S.I.S.D.A.C.
O le maota o se hall a le kolisi maualuga o Vaimauga o loo faamautū iai le mafutaga na amata i le Aso Faraile ua mavae ae faamoemoe e tapunia i le Aso Sa o lumana’i nei.
O le ta’ita’i aoao le susuga Ata Tavale Tanuvasa e 41 tausaga o tautua i le Ekalesia Aso Fitu Samoa Tuto’atasi ua ia tuua, ae o le faatalanoaga ma le faife’au na ia faailoa ai māfua’aga o le solomuli mai le lafumamoe sa tautua ma auauna ai, lea ua solomuli ese ai nisi o faife’au ma tagata lotu ma lagolago atu i le mafutaga ua ia faamaopoopo ma amata faagaioi.
Le ta’ita’i aoao o le Ekalesia Aso Fitu o le Valaau Mulimuli a le Atua, susuga Ata Tavale Tanuvasa.
O le Aso Sa o muamua nei i le sauniga e tapunia ai le mafutaga a le ekalesia o le a faauu ai ma faife’au e to’afitu o le a galulue i le laugaina o le upu folafola.
