Ua mae’a ona toe saini le afioga i le Ao Mamalu o le Malo i Tulafono fou o Fanua ma Suafa na pasia ia Tesema o le tausaga e 2020, ma ua aveesea ai suiga na toe faia mulimuli ane lea sa tuuaia ai nisi o le aufaigaluega a le Ofisa o le Fono, ma le Peresetene o Faamasinoga o Fanua ma Suafa.
Ua faailoa lea tulaga e le Minisita o Fesootaiga ma Faamatalaga Faatekonolosi, le afioga Toelupe Poumulinuku Onesemo i le polokalame o le Soalepule a le TV2, i le po o le Aso Lulu nei ma ia faailoa ai foi, ua taatia nei ia tulafono mo se isi iloiloga i le faamoemoe e fausia ai nisi suiga, a o lei toe foi i le Palemene e pei ona taatia mai ai i se finagalo o le Fono Aoao Faitulafono talu ai nei.
O se tasi o mataupu na faailoa e le Minisita o loo iai i lana vaaiga le Ofisa o le Fono Aoao, o le sailiiliga o loo faagasolo i le motusia o fesootaiga tau initaneti, o loo alu ai faasalalauga o le fono usu a Samoa ma maua ai e le toatele taualumaga a le Palemene i luga o upega tafailagi i le fesootaiga o le api o foliga le facebook.
Faaalia e Toelupe o le itu o loo faanoanoa ai, ona e foliga o le motusia o faasalalauga e mafua i ni gaioiga e le tatau ona faia e tagata faigaluega a le Malo, o loo fitoitonu iai ia tomai tau fesootaiga.
Faaalia e le Minisita e poo a lava faiga faapati faaupufai, e tatau i tagata faigaluega a le Malo ona tautua ma le atoatoa i le faigamalo ua tu i le foe.
