O Iulai o le tausaga nei na mae’a ai le 3 tausaga o le konekarate a le Komesina o leoleo, falepuipui ma le toe fuata’ina le tofa Auapaau Logoitino Filipo, ma faasalalau ai le avanoa ae faaauau pea mo ni masina lona tauaveina o le tofiga i se faai’uga a le Kapeneta o le malo tausi sa tauaveina le pulega o le malo.
O le Aso Tofi o lenei vaiaso i Samoa na logoina ai le tofa Auapaau Logoitino i le faai’uga a le Kapeneta ina ia faamuta loa lona taimi galue, e pei ona ia faailoa i le auaunaga faasalalau o le MarMada Pacific o se vaega faasalalau e le’i leva ona faavaeina i Samoa.
O le Aso Faraile o lenei vaiaso o le aso mulimuli lea o le Komesina i le galuega.
O le tausaga e 2022 na amata galue ai le tofa Auapaau Logoitino Filipo i le tulaga o le faauluuluga o lea matāgaluega e ala i le tofiga Komesina, ina ua faamavae lē sa se’ei i le tofiga le afioga Fuiavailili Egon Keil.
E iai le talitonuga o le a toe faasalalau le avanoa e ui ua mae’a ona faasalalau muamua ma ua iai nisi sa talosaga iai.
O le faalauiloa a le matāgaluega i le Aso Lulu i le tetee atu i le faaaogāina o fualaau faasāina o se tasi lea o tiute tauave mulimuli o le Komesina ua mae’a lona taimi galue, ma o ia sa avea ma fofoga o le polokalame o lea aso tāua.
O se taimi muamua ua faatino ai e le matāgaluega o leoleo, falepuipui ma le toe fuata’ina lea polokalame i le lagolago a leoleo o le Malo o Ausetalia.
