Ua faamauina le maoa’e o le aofaiga o tagata o le atunuu e tatau ona fai tui puipui o le faama’i Koviti 19 ua maea le tui muamua lea e tusa ma le 94.1% poo se aofaiga e 114,698. 

O tagata ua maea le tui lona lua e 57,618 poo le 47.3% o faamaumauga iai a ua maea le 2 aso sa faagasolo ai le tuiga tele, e pei ona sa tapunia ai aoga ma galuega ma faasa foi tagata ona feoai ae talimau i o latou laoa ma maota e faatali ai le taunuu atu o le aufaigaluega o le Soifua Maloloina mo le faia o latou tui puipui.

E iai se vaega o le atunuu ua lē mananao e fai o latou tui ona o talitonuga faalelotu a’o nisi ua talitonu i faasalalauga i luga o upega tafailagi ma fesootaiga faaonaponei le social media.

Taua e le Faatonu o le Matagaluega a le Soifua Maloloina Leausa Dr. Take Naseri “E le’o toatele a faapasene atu i le eligible population e lē tēle se pasene i le taimi lenei ona o lea e le’i atoa, o le ala foi lea, o lea e faaputu sei vaavaai lelei iai ae o’u te iloa o isi a e amata faapena ae uma ifo ua fai le tui, e leai a se finauga i le amataga ae talanoa talanoa a fai le tui”.

Taua foi e le faauluuluga o le Ofisa Faapitoa o Faalavelave Faafuasei le NEOC afioga Agafili Shem Leo i le tulaga o faafitauli ia feagai ma le faatinoga o galuega “E iai isi luitau ua matou maitauina o aiga lae nonofo i totonu o le nuu ae e lē fainuu poo lae foi e te’a ma le Nuu a lae nonofo a i totonu o le nuu, o le feau la sa ave ai o le tūiga e faasopolia atoa lava, fai nuu, lē fai nuu, te’a ma le nuu e faatino uma a le tui, e ese mai la i mafuaaga ia e pei o le talitonuga faalelotu ma le talitonuga foi lele i le vaavaai i mea lae sau i luga o upega tafailagi”.

Taua foi e Agafili “O lea e faamaumau uma e teams ma sa iai foi ma sui o nuu ma sui tamaitai a uma Loa na fai le clean up ona iloa lelei ai lea aua e mafai ona tatou faapea o latou ia o le high risk population pe afai e tupu se faalavelave ma oo mai le faama’i.”

O le galuega lenei e toatele le aufaigaluega a le malo na faatinoina aemaise lava o le vaega o le koluse mumu ma na momoli ai le faafetai a le malo e ala mai i le Minisita o le Soifua Maloloina.

Taua e le afioga Valasi Luapitofanua Toomaga Tafito Selesele “E momoli le agaga faafetai ia te outou uma e oo lava i sē aupito ititi o aufaigaluega totofi a le tatou malo e oo lava i ave taavale, tasi lea o matafaioi faigata o le faafoeina o outou sā aemaise foi o malu o le malo ma outou uma i matagaluega tumaoti mo faafoeina o le galuega.

E le lava upu a le malo e taui ai lo outou agaga tautua.”