Ua lapata’i ane le failautusi o le puipuiga a Amerika o Pete Hegseth ia Moscow, afai ae leai lava se faamutaina o le taua i Ukraine, o lona uiga o le a faatino loa e Amerika ma isi paaga a le NATO ni tau i luga o Lusia mo le faaauau pea o ana osofa’iga o loo faia.
Fai mai Hegseth i le CNN o le a faateleina le malosi o Ukraine i tulaga tau ‘au’upega e ave ane mai Amerika ae e lē o manino mai pe aofia ai ma ‘au’upega fana mamao e pei ona aga’i iai le saunoaga a Trump i le amataga o le vaiaso.
Ua una’ia ai loa e le alii failautusi atunuu ina ia inivesi i le faatauina o ‘au’upega i lalo o se taumafaiga ua faaigoa o le Prioritise Ukraine Requirements List.
I lalo o lea polokalame ua vaaia ai le oo i le 2 piliona ua foa’i atu mo ‘au’upega tau militeli mo Ukraine ae e le’i ausia lava le $3.5 miliona lea o loo taumafai Zelensky e ausia.
Fai mai isi ta’ita’i o le lalolagi o loo auai faatasi i lalo o lea taumafaiga o le auala aga’i i le filemu o Ukraine, o le faia lea o sanctions poo sā faasaga ia Lusia e aafia ai lona tamaoaiga ma e faatino lea tulaga i le kiliva atu o ‘au’upega mo Ukraine.
Ua ta’ua i le lipoti se faamatalaga mai le Minisita o le Va i Fafo a Lusia e faatatau i faamatalaga a Trump na faia e uiga i missiles mai Amerika, afai ae sapalai ane e Amerika ‘au’upega nei ia Ukraine, o le a matua’i faaleagaina ai loa le sootaga a Moscow ma Uosigitone.
Puna o Faamatalaga: https://edition.cnn.com/2025/10/15/europe/ukraine-hegesth-firepower-coming-nato-intl-hnk
