Ua faailoa mai e le US Geological Survey o le mafuie na lulu i le itu i Saute o Vanuatu i le vaveao analeila, e 6 le malosi i le fuamafuie ae leai ni lapataiga o se tsunami na afua ai.
O le toe faatulagana lea mulimuli ane ae sa muai lipotia e 6.5 le malosi.
Sa faailo foi i lipoti a le vaega lea e ui e malosi peitai e itiiti se tulaga e ono aafia ai ni soifua ma mea faaleagaina.
O le tea laititi o le ‘afa o le 3 i le vaveao na lulu ai le mafuie e tusa lea ma le 288km i le itu i Saute i Sasae o Isangel i le motu o Tanna ma e 10km le loloto o le mafuie.
Ua faailoa mai e le ofisa o le Pacific Tsunami Warning Centre i Honolulu e le o iai se gaioiga o manaomia ona faia i le taimi nei e fua i faamaumauga tau mafuie mo se tsunami i le itulagi.
