O le fuafuaga a le pulega o tagata tafafao mai fafo e tapuni le nofoaga o le nuu o tu ma aganuu poo le cultural village, ae se’i toe tapena le nofoaga e aofia ai falesamoa mo le Fono a Malo o le Taupulega, ua ave ai se tusi a se tasi o faipisinisi o loo totogi lana lisi i se falesamoa o loo faagaioia ai lona faleoloa o meaalofa poo se gift shop.

Ua faailoa e le faipisinisi le afioga Tupuola Eleitino Therese Finau i lana tusi i le Pule Sili o le pulega o tagata tafafao, e na te mana’omia se faamaninoga o le faai’uga e pei o le aso e toe tatala ai le nofoaga, ma le aso e toe avanoa ai le tatalaina o lana pisinisi i le nofoaga.

O le fono a le aufaipisinisi ma le pulega i le vaiaso na te’a nei na faailoa ai e le Pule Sili ni ona atugaluga i faasalalauga taufaaleaga ua faasaga atu i le pulega ua salalau i luga o fesoota’iga televavave le social media, peitai o le tasi lea o mafuaaga o le tusi a le faipisinisi e fia manino poo ai tonu na faia ia faasalalauga taufaaleaga i le Pule Sili, ona ua faalauaitele ae lē iloa poo ai.

Ua faaalia ai e Tupuola Therese Eleitino Finau i lana tusi, o le a ia ave se tagi o le taufaaleaga i le faamasinoga e faatūtū i le pulega ma le komiti faafoe.

O loo tālia se taimi e finagalo ai le Pule Sili e faia se talanoaga e aumai ai sona finagalo i vaega ua faailoa e lea faipisinisi i lana tusi, ona sa maua se fesoota’iga i le Pule Sili le afioga Toleafoa Pativaine i le Aso Gafua na tāpā ai sona finagalo e faatatau i mataupu sa laga i le latou feiloa’iga ma faipisinisi o loo lisi i le nuu o tu ma aganuu a le pulega o tagata tafafao.