A lelei ona lufilufi le tamaoaiga ma mautinoa o loo oo le faasoa e amanaia ai tagata uma, o le mautinoa foi lea o loo mautu ma maopoopo se atunuu, e leai se isi o tuulafoaina. O le autu lea o se mafutaga faalea’oa’oga sa faatautaia e le Matagaluega o Tina ma Tamaitai atina’e o afioaga ma agafesoota’i sa unaia ai le avanoa tutusa o tagata uma i le itupa o alii ma tamaitai i faamanuiaga tau i le a’oa’oina, faapea i galuega o tomai eseese. 

O le tausaga e 1992 na sainia ai e le Malo o Samoa le Feagaiga Faavaomalo e tafiesea ai faiga faailoga tagata faasaga i tina ma tamaitai le (CEDAW) ma o le Matagaluega o Tina ma Tamaitai, Atinae o Afioaga ma Agafesoota’i e taulamua i le unaia o galuega mo avanoa tutusa i totonu o Samoa ma le faamalosia o moomiaga o lea feagaiga, e aofia ai le fausia o Faiga Faavae mo le unaia o avanoa tutusa faatasi ai ma le faamalosia o galuega faapaaga ma isi auaunaga ma faalapotopotoga eseese e galulue faatasi i faatinoga uma aemaise o le faaaogāina o agavaa ma tomai tau agafesoota’i.  

O se tasi vaega tele o le unaia o avanoa tutusa, o le silasila lea i le faasoaina o puna’oa poo le tamaoaiga e atagia ai le amanaia o tagata uma, e ala i le tapenaina ma le fuafuaina lelei o tala o le tupe e mautinoa ai le oo o le faasoa i tagata uma. O le auga lea o se polokalame faalea’oa’oga sa alo iai le Matagaluega o Tina ma Tamaitai, Atinae o Afioaga ma Agafesoota’i i le masina o Me. O lenei galuega o loo soosoo tau’au ai le Matagaluega ma le faalapotopotoga a Malo Aufaatasi e tauala mai i le Polokalame o le Spotlight Initiative. O lea polokalame faalea’oa’oga ua autu i le ‘lufilufi lima lelei o le tamaoaiga mo le manuia o tagata uma’ poo le gender responsive budgeting i le gagana Peretania.  

O le mae’a ai o ia a’oa’oga, sa tauaaoina atu ai le ulua’i kopi o le ta’iala mo le faatinoga o a’oa’oga tau lufilufi limalelei o le tamaoaiga i le Ofisa Sili o Pulega o le Matagaluega o Tina ma Tamaitai, ma le faamoemoe e tuuina atu aloaia le kopi mautu i se taimi e lē o toe mamao. E lē gata i lea, ae ua faatuina ai ma se Komiti faapitoa e taulamua i le unaia o le galuega o le lufilufiina o le tamaoaiga mo le manuia o tagata uma. O lea komiti o loo aofia ai nisi o sui o faalapotopotoga tuma’oti ma auaunaga a le Malo.