E lua tagi o tuuaiga faiga solitulafono e mafua i palota laiti e 6 na faatino e le masina o Noveama ua faaulu atu nei i le faamasinoga.
Ua faailoa e le sui resitala o le Ofisa sui lagolago foi o loo tauaveina le pulea o le Matagaluega o Faamasinoga ma le faafoeina o mataupu tau faamasinoga le susuga Aumua Ronnie Fereti o le Aso Gafua ma tauaao ai e le Ofisa le tagi tau palota mai le Itumalo Sagaga No.2 o loo tuuaia ai e le sui tauva o le Faatuatua i le Atua Samoa ua Tasi ia Fata Ryan Schuster le sui na manumalo ia Maulolo Tavita Amosa. O le tagi lona lua e mai le itumalo o Falealili No.2 ua tuuaia ai e le sui na tauva mo vaega e Puipuia Aiā o Tagata le susuga Leleimalefaga Neemia Fonotia le sui na manumalo na tauva i lalo o le Vaega a le FAST ia Maiava Fuimaono Tito Asafo.
E lei faamautuina se aso o le a valaau ai mo le taimi muamua ia tagi e lua i le faamasinoga ae pei ona silafia o le tauaofiaaga o lea Palemene i le Aso Lua o lenei vaiaso na faatautō ai Maulolo Tavita Amosa ma Maiava Fuimaono Tito Asafo faatasi ai ma isi sui e to’a 5 na filifilia mai i faigapalota laiti a ia itumalo.
