I tagi e tolu o moliaga o faatōsina solitulafono sa faatulaga e amata su’esu’e i le vaiaso muamua lenei o faamasinoga o talosaga i tuua’iga o faiga faaālatua e māfua mai i le taunuuga o le faigāpalota tele, ua na o le tasi le matāupu poo se tagi o tuua’iga o faiga faaālatua ua faaauau ona su’esu’eina.
Ua mafua lea tulaga ona ua toe faaui i tua tagi e lua sa faaulu e sui tauva o le vaega faaupufai e Puipuia Aiā Tatau a tagata mai le itumalo o Aiga i le Tai, ma le sui sa tauvā i le faigā filifiliga a le itumalo o Faasaleleaga 5.
O le tagi a Mulipola Leiataualesā Leiataualetauā Laki sa molia ai le sui na manumālō le Fofoga Fetalai o le Palemene le tōfā, Auapaau Mulipola Aloitafua Mulipola ua faailoa e loia a le itu tagi ma le itu na faasaga iai moliaga ua malilie sui o loo aafia e toe faasolomuli i tua ina ua malilie itu uma, i le faamoemoe ia maua le fealofaniga ma tausia le filemu o le itumalo.
O le aso 24 o Oketopa e toe valaau ai lea tagi mo le faamautū atili o le taunuuga ua malilie iai pe a mae’a ona faasalalau faalaua’itele lea maliega.
O le tagi a le afioga Peseta Vaifou Tevagaena faasaga i le sui na manumālō i le nofoa o Faasaleleaga 5 o le Minisita Lagolago o le Matāgaluega a le Palemia ma le Kapeneta le afioga, Vui I’iga Sione I’iga ua faapena foi ona iai le autasiga e ala i se maliega e toe ave i tua.
Ua faasalalau foi faalaua’itele lea taunuuga ma le faamoemoe e toe valaau lea matāupu i le faamasinoga i le Aso Gafua a sau e faamautū atili ai le faasolomuli o le tagi a Peseta Vaifou Tevagaena.
O moliaga foi a le sui faipule o Faasaleleaga 5 faasaga i le itu tagi ua ave foi i tua ma e faapena foi i moliaga a le sui faipule o Aiga i le Tai.
O le tagi a le isi sui tauvā o le vaega e Puipuia Aiā Tatau a tagata sa se’ei i le nofoa o le itumalo palota o Safata i le afioga Lea’anā Ronnie Posini o loo faaauau e pei ona molia ai le sui faipule na manumālō le Minisita o Puna’oa, Faalenatura ma le Si’osi’omaga, le afioga Seve Te’i Fuimaono.
O le tasi lea o matāupu e tolu iai tagi ua faatulaga mo le vaiaso nei.
E 4 tagi a sui sa tauvā mo le vaega e puipuia aiā tatau a tagata, 3 tagi na faaulu e sui faipule manumālō o le Faatuatua i le Atua Samoa ua Tasi, ma le tagi e tasi na faaulu e le sui sa tauvā faatuto’atasi.
O le vaiaso fou isi tagi ua faatulaga e su’esu’e ai, ma le vaiaso mulimuli o Oketopa se’ia oo i le vaiaso muamua o le masina fou o Novema.
