E tolu moliaga o le faaoolima matagā sa agai i ai suesuega a le Court Martial, mo le tamaitai seila a le vaegaau o le sami, le Navy, le susuga Roselia Daniella Epati, peitai i le uma ai o iloiloga ua faamaonia na o moliaga muamua e lua, ae ua teena le moliaga lona tolu o le faaoolima matagā.

E fa itula na faaaluina ai aso e lua mo le iloiloina e le laulau o faatonu o nei moliaga, ma aumai ai loa le iuga e pei ona faitau mai e Judge Maree MacKenzie a o tutula’i le tamaitai ofisa o le Navy, Roselia Daniella Epati i lana togiga, i le Devonport Naval Base i Aukilani i le taeao o le Aso Lulu, 18 o Ianuari 2023.

Mulimuli ane ona lauina ai lea o le faasalaga o Epati, e ala i se a’oa’iga mamafa na tuuina mai iai, ina ua mavae ona faamatalaina ma loimata e se tasi o ona tausoga le tulaga o le aganuu faa-Samoa a le latou aiga, ma le tulaga ua tulai mai i moliaga ua faamaonia o Epati, e pei ona ta’ua e lona tausoga, e ono oo ai i le tulaga o le faatō pe disown lenei tamaitai e ona mātua, ona o se mataupu ua aumaia ai le faalumaina i le igoa ta’uleleia o le aiga.

O moliaga nei ua faamaonia o Epati, o loo ta’ua i lipoti pe ana faapea o se civilian court lea e fai ai, o lona faasalaga e oo atu le maualuga i le fitu tausaga i le falepuipui.

I se faamatalaga i lenei mataupu ma tuua’iga na molia ai Epati, na ta’ua ai e toatolu i latou, o se alii ofisa ma ni tamaitai seila se toalua lea na faaulu a latou tuua’iga faasaga ia Epati e faapea na ia loteina ma le lē talafagai i latou (touching them inappropriately) i ni taimi eseese a o faia se inugapia ma ua faasua’avā le tamaitai seila o Epati, a o taula le HMNZS Canterbury i Lytttleton, e lata i Kalaiesetete, ia Fepuari o le 2021.

E lei faailoaina suafa o i latou uma nei na faaulu a latou tagi ona o manumanuga i le ogaoga o tuua’iga na fai. Peitai e tusa ai ma latou moliaga, e foliga mai o le taimi na faasuaavā ai Epati lea sa tutupu ai mea nei o le tagotago atu o Epati i o latou itutinosa i se tulaga lē talafeagai.

Sa teena e Epati le tuuaiga a le tamaitai seila muamua, e na te lei iloa se mea na tupu e faapea na ia tago atu ai ma lote le nofoi (buttocks) o lea tamaitai seila, peitai mo le tuuaiga a le alii ofisa, na ta’ua e Epati sa vave ona ia toe faamalie i le alii ofisa ona o lona sasi e mafua mai lona onā lea na fai ai ana faamatalaga ma olo atu ai ona lima i auaga (tulou) poo upper thigh o le alii ofisa, ae e lei iai sana fuafuaga e na te fia loloteina le alii seila ma faatinoina na uiga matagā.

Na ta’utino Epati na ia iloa lava ua masiasi le alii seila i le mea na ia faia, aemaise ua taliē isi tagata na iai iina, o le ala lea na ia faamalie soo ai ona e lei manao e in trouble i le tulaga faasua’avā lea na iai, ae lei faapea na faamalie ona ua ia faia se gaioiga matagā.

O le tamaitai seila lona tolu na fai lana tuua’iga sa ia faamatala e faapea na la talanoa ma Epati mulimuli ane ua uma ona tutupu mea muamua ia sa tuua’ia ai, ma a o faamatala atu e Epati mea na tutupu, na tago atu ai Epati i lalo i lona itutinosa e faataitai mea na tutupu.

Na faafitia uma e Epati tuua’iga ia faapea sa ia loloteina itutinosa o tamaitai seila. Ma sa saunoa le loia na tulai e puipui Epati, defence lawyer Matthew Hague, e foliga mai e sese le tuua’iga a le tamaitai seila muamua e faasino i le tagata na loloteina atu lona nofoi, ae mo le isi tamaitai, o se uo mamae a le tamaitai muamua, pe atonu o lana tuua’iga lea ua fai ua na ona lagolago atu ai i lana uo le tamaitai muamua, ae ua le o tautala sa’o ai.

Na finau Hague, e tusa foi pe manatu le laulau o faamasino e sa’o na lolote e Epati le nofoi o le tamaitai seila muamua, ae le tatau ona iu ai fua i ni moliaga matuā matuia o ni sauaga matagā.

O le finau a le loia a leoleo, crown prosecutor Sam McMullan na ia ta’ua ai, e fai lava si ogaoga pe afai ua tutusa uma se mea na faufau e nei tagata e toatolu na fai a latou tuua’iga i mea na tutupu ia latou. E leai sona manatu o se mea na fafau faatasi le faia o nei tuua’iga sese, e lē fetaui i lona mafaufau.

Ta’ua e McMullan, e na te ioe i le manatu, e lei mafaufau i le tamaitai seila muamua e faaulu sana tagi faasaga ia Epati, auā e lei iai sona manatu o se mea ogaoga lea na tupu, peitai o ona uluai lagona i le mea na tupu e le tatau ai ona faatalanoaina a o iloiloina mea moni o nei moliaga, e ui e le faaitiitia ai le matuiā o mea na tutupu.

Peitai e lei ioeina e le laulau o faamasino lea finauga, ae na latou ioe e faaleaoga le moliaga lona tolu ae faaauau isi moliaga e lua.

A o faitau mai le faasalaga o le tamaitai seila o Epati, na faamatalaina ai o se tasi na amata galue i le Navy i le tausaga e 2016 i le vaega o catering and hospitality ina ua mavae le tele o tausaga sa galue ai le army. Ma e lei nisi ona moliaga muamua atu, o lena foi sa faaeaina ai i ni pine taualoa se tolu na faaee atu i ai (three service medals).

E tele isi molimau e lagolagoina ai ni itu lelei o lenei tamaitai seila mai nisi o lona aiga.

O le faaiuga o lenei mataupu, ua aumaia ai se faaiuga nai lo le faaleaoga o lana galuega aua uma leva ona tuua e Epati ona tiute faagaluega, ae o le a ia totogia na o le $2,000 o se emotional harm payment, o lea seleni o le a vaelua mo i laua e toalua na faia tuua’iga ma faamaonia ai na tuua’iga.

E faaopooopo i ai ma se a’oa’iga mamafa mo ia, e pei ona faailoa atu ia Epati lona tuumāmāina ma le ta’uvalea o le New Zealand Defence Force i le gaioiga na ia faia.

I se vaega o le folasaga faaiu a Judge MacKenzie a o tuuina mai lana faaiuga na ia ta’ua ai, “Your behaviour fell well below the expected standards….. You have brought the New Zealand Defence Force and yourself into disrepute.”