O itumalo palota o Gagaemauga Numera Tasi ma Faasaleleaga Numera 3 ua faaopoopo atu i itumalo faapalota ua muamua faamatuu iai le vaegatupe e 160 afe tala, o le miliona lona lua.
O le fono a le komiti faafoe o le poloketi e tasi le miliona tala a le Malo na usuia i le aso 3 o Me na talia ai le faamatuu atu o uluai vaegatupe o le miliona tala lona lua mo ia itumalo e lua o le motu tele i Salafai.
E pei ona silafia ua mae’a tuuina atu le uluai miliona i itumalo faapalota e 51 o le atunuu, ae o le lona lua lea o tai miliona ua faamatuu i ta’ita’ifono ma sui o komiti o fono faavae a itumalo ua mae’a tuuina atu faamatalaga o tupe o le faaaogāina o le miliona muamua, ma ua talia foi a latou tapenaga o poloketi mo le faaaogāina o le miliona lona lua.
O se vaega o le saunoaga a le tamaitai Minisita o le Matagaluega o Tina ma Tamaitai, Atina’e o Afioaga ma Aga Fesootai, i le sauniga o le sainigalima na faia i le Aso Lua o le vaiaso nei, lea ua faamatuu atu ai le ta’i 160 afe mo Gagaemauga Numera Tasi ma Faasaleleaga Numera 3.
O se sainigalima na auai ma le Minisita o Tupe le afioga Lautimuia Afoa Uelese Vaai.
