Na tapunia faafuase’i se tasi o kolisi i Aukilani ananafi e feta’uaina ai se agaese.
E latalata i le tolu ua iai nisi o mātua i fafo o le a’oga e piki a latou fanau, ae faate’ia loa i le sau o le imeli mai le a’oga a Glendowie College o loo lockdown mo le saogalemu o fanau.
I lea imeli na faatalosagaina ai mātua e aua ne’i vili atu i totonu pe o atu foi i totonu o le a’oga mo le saogalemu.
I lipoti a le Herald o loo ta’ua ai e faapea o se tasi o tamaitiiti sa ia umia se agaese.
Peitai i molimau faamoemoeina a tala fou sa iai i lea taimi, e moni o lea sa faaleagaina meatotino a le a’oga ma faamanu’alia ai se tasi o tamaitiiti mai amioga a lē o loo tuua’ia, ae e le’i vaaia se agaese.
Peitai o le tamaitiiti ua tuua’ia lea na ave e leoleo ananafi, e lē o le uluai taimi lea ua tulai mai ai se mea faapea i le a’oga, o le masina foi talu ai na alu atu ai i le a’oga ma le agaese ma ia taufaamata’u se tasi o tamaitai a’oga o le a ia faaoo i se tasi o ona tuagane le oti.
E le’i manuia taumafaiga a tala fou ina ua taumafai atu iai i le a’oga, ae afai ae toe faataga lea tamaitiiti a’oga, o se fesili tele lea i faai’uga a le pulega.
