Ua iai se lipoti na faalauiloa i le One News i le aso ananafi e faapea e le o toe mamao ae faataga e le malo tagata mai Samoa e masani ona femalagaa’i i le va o atunuu e lua e alofia ai vaega manaomia o visa pe afai e fia malaga mai i Niu Sila.
Ua faailoa i lea lipoti se faamatalaga ua faamaonia mai ai e le minisita o femalagaa’iga o Michael Wood e faapea o loo iai le fuafuaga e sainia lea suiga i ni nai masina e le o toe mamao.
O lona uiga o le a aofia ai tagata Samoa e masani ona malaga mai i Niu Sila i tulaga faapisinisi pe o malaga foi faale malo. Fai mai le minisita i lea lipoti e iai ni talosaga sa o latou vaavaai iai aemaise lava mai ia i latou ia e malaga soo i le va o le Pasefika ma Niu SIla.
Ina ua fesiligia pe ono faalautele ane lea faiga e aofia ai ma isi atumotu o le Pasefika na faaalia e le minisita o loo silasila i itu uma ia.
E lei leva atu ona faailoa i nisi lipoti a le One News popolega o taitai o komiuniti Pasefika i aiaiga o visa malaga mai i Niu Sila.
O le taimi nei e le o iai se aiaiga mo tagata Niu Sila e fia malaga atu e faimalologa i Samoa ma isi atunuu o le Pasefika pe tau talosaga foi mo se visa tafao.
