O le a toe tumau pea le alii faiaoga o Scott Robertson i le Crusaders i le tausaga fou ma o le a lē filifilia o se faiaoga o le ‘au a Egelani. 

Ua faailoa ia tulaga i le lipoti a le Newshub i le asō a o faaauau ai pea taumatega i le avanoa o loo matala mai i lea faaitu o le lalolagi ae o le a toe tumau pea i le Crusaders. 

Ua faailoa e nisi o sui o le Crusaders lea tulaga ma ua matuai fiafia le ‘au ina ua toe nofo atu le alii faiaoga e pei ona faailoa i le lipoti.

O le vaiaso nei o loo feta’ua’ina e faailoa ai e Egelani le latou faiaoga ulu fou e suitulaga ia Eddie Jones lea ua faamalolo.

O loo iai faamatalaga salatua mai Egelani e faapea o lē sa avea ma kapeteni o Egelani i tausaga ua tea o Steve Borthwick lea o le a suitulaga ia Jones, peitai ua faailoa e lipoti a le Newshub sa faia se feiloaiga a Robertson ma le RFU i le mataupu ma afai o le a tumau pea Robertson i Niu Sila mo le tausaga fou o le a matala ai le avanoa mo le NZ Rugby e faatalanoa ai le avanoa o le faiaoga o le All Blacks lea o le a ono avanoa ane pe a mae’a le konekarate a Ian Foster i le mae’a o le Ipu o le lalolagi.