Ua faamaonia mai lipoti, o le alii fitafita Niu Sila ua maliu a o auai atu i le taua i Ukraine, o le susuga ia Kane Te Tai.
O Kane Te Tai o se “toa” e pei ona molimau ai se tasi foi o fitafita Niu Sila sa latou galulue faatasi ai i le taua lea i Ukraine, le alii o Jordan O’Brien.
Ta’ua e O’Brien, “Ou te manao ia silafia e tagata, o Te Tai o ia o se toa manumanu ua uma lava lona soifua i le faatinoga o lana tautua e tau mo se mafuaaga tatau na matuā tuu atoa i ai lona loto.”
Ua lona tolu ai ia Te Tai ni tagata Niu Sila ua maliliu mai le taua lenei i Ukraine talu mai le tagata aid worker ma le isi fitafita lea na maliliu ai foi talu mai ona amata lenei taua ia Fepuari o le tausaga talu ai 2022.
Ua lipotia mai le lē utuva o le solo mai o faamaisega ma faamafanafanaga i le aiga ma uomamae a lenei alii fitafita.
O le lipoti a le leitio a Niu Sila na ta’ua ai o lea fitafita na maliu a o iai i le taua i le itu i Sasae o Ukraine.
