O loo faaauau pea ona faateteleina timuga mamafa i Northland poo le faaitu i Mātū o le atunuu ma faasolo atu i luga.
Ua tapunia le Tāmaki Drive i Aukilani i le va o Mission Bay ma le kalapu vaafailā i Ōrakei, ona o ni ‘alā ma palapala ua solo ifo i le auala.
Ua faamatalaina e le MetService le tulaga faaletonu o le tau lea o loo aga’i mai, o le a aumaia ai le tele o ni aafiaga ma lamatiaga eseese.
O le malolosi o timuga e foliga mai o le a pa’ūū i le aga’i i luga i le Motu i Mātū, aemaise lava mai Northland aga’i atu i le itu i Sisifo o le Bay of Plenty.
O loo faamalosia lapata’iga o timuga malolosi o le a to’ulu mo Northland se’ia oo atu lava i le 4am i le vaveao a taeao, e aofia uma ai vaipanoa i Sasa’e o Kaikohe mai Doubtless Bay e oo atu i Whangārei.
O loo augani atu le Pulega o le Itumalo o Whangārei i soo se tagata ua lagona e lē o saogalemu i lona maota ina ia oese ai loa a o aga’i mai matagi malolosi.
O loo iai foi lapata’iga o savili malolosi ua tuuina mai mo Northland, Aukilani ma Great Barrier, ma savili malolosi e agi mai mātū i sasa’e e oo atu lo latou malosi i le 120kilomita i le itulā.
Ua faailoa mai foi e le kamupani pasi o le Waka Kotahi a le NZ Transport, ona o savili malolosi, e ono tapunia ai auala i luga o le auala laupapa le Harbour Bridge i Aukilani.
I le motu i Saute, o loo iai foi lapata’iga o timuga mamafa mo le itu i Mātū i Sisifo o le Tasman, o Motueka ma le Richmond.
O se isi lipoti lata mai ua faamaonia ai, e 25 a’oga ua tapunia i Northland, ua aafia ai le toetoe 4 afe fanau a’oga.
Ua faia nei faai’uga a pulega o a’oga ona ua silasila pulega i tulaga faaletonu ua iai auala ma ua manatu ai ua sili ona faamuta a’oga a le fanau ma ia foi vave atu i aiga mo lo latou saogalemu a o le’i faatetele uiga loulouā o le tau o loo faasolo mai.
O nisi vaega o le pito i luga o le North Island ua tapunia ma ua motusia ai nei fesoota’iga atu na vaega o le atunuu.
E latalata i le 2 afe fale o aiga ma nofoaga o pisinisi ua pē ai le eletise, ma le tele o aualatetele poo highways ua tapunia uma.
E fautuaina le siaki atu i le upega tafa’ilagi a le NZTA mo nisi faasilasilaga lata mai o auala ua tapunia.
O loo faailoa nisi o nofoaga e pei o marae a Māori ua tatala mai mo le aga’i atu iai o le mamalu o le atunuu ua lē o saogalemu le iai pea i o latou maota.
Talosia ia e vave ona toe masuiga mālie atu le tulaga loulouā o loo iai nei le tau i nisi vaega o si o tatou atunuu, ma ia manatua i latou ia tatou tatalo.
Puna o Faamatalaga: https://www.nzherald.co.nz/nz/weather-live-updates-subtropical-low-brings-heavy-rain-gales-to-upper-north-island/NHLZQSDBZ5CGLMTNSNOPAJLVAY/
