O se lipoti lata mai o le tulaga pagatia o loo iai se vaega o le atunuu talu mai ona amata timuga mamafa i faaitu i Mātū o le atunuu ma lea ua faasolo atu i le motu i Saute, ua tele ata ua tuuina mai ma iloa ai le tele o vaega o auala ua faaleagaina, ua motusia ona o lōlōga malolosi.
Mai le itumalo o Tasman, ua matuā fautuaina tagata ina ia ‘alofia le toe feoa’i mai le auala on aua tapunia feoa’iga talu ai le malolosi o le tatafe o lōlōga mai timuga mamafa o loo to’ulu pea.
Na amata mai lava ananafi ona tapunia le tele o auala ma e faatalitalia le toe faaopoopo o isi auala e tapunia foi i le aso lenei.
Ua lē mafai ona toe sopo atu i Mārahau ona ua tapunia auala i Riwaka-Sandy Bay Road ma le Kaiteriteri-Sandy Bay Road ona o le loloto o lōlōga ma maa tetele o loo solo mai luga o mauga.
Ua matuā pisi faasoloatoa auaunaga lavea’i mo faalavelave faafuase’i, e pei ona lavea’ia ai se tagata na lavea ina ua pa’ū ifo iai se laau e latalata i Blenheim a o alu sana savaliga, ae faafetaia le vave atu o le fesoasoani na mafai ai ona toe lavea’ia mai.
O nisi o vaaiga i le faaleagaina o auala ua faatusa e nisi e pei na faaleagaina e se mafui’e na lūlū.
E pei ona iai le auala laupapa le Whakapara Bridge na matuā mavaevae le auala tā ma mafitifiti ese vaega o le auala i le State Highway 1 i le itu i Mātū o Whangārei.
Mai le vaega a le MetService, i le mamafa o timuga nei o loo totō pea, e foliga mai e iai isi faaitu ia o le a aga’i iai le lapata’iga o le lanu mūmū.
O le taimi nei o lea ua iai le faaitu o Northland ma Whangārei i le state of emergency, ma e oo atu i le fitu aso le umi o le a iai lapata’iga o faalavelave faafuase’i mo na vaega o le atunuu.
E ui la atonu e oo mai se taimi o le a tau tau māui atu lōlōga mo na faaitu, ae o lea ua aga’i lapata’iga i isi foi faaitu, e pei o le faaitu i Tauranga, lea ua alu atu le lapata’iga a le pulega o lea aai i tagata uma ina ia mataala i lamatiaga o ni sologā eleele.
O le taimi nei o loo saofa’i Tauranga i le lapata’iga lanu moli se’ia oo i le 1am i le vaveao taeao le Aso Toona’i, ae telē se avanoa e ono suia atu ai loa i le lapata’iga lanu mūmū.
Ua lapata’ia tagata ina ia mataalia ia vave ona oese mai nofoaga o nonofo ai pe afai o loo latalata i vaega e ono aafia i ni sologā eleele.
O Bay of Plenty foi lea ua aga’i atu iai lapata’iga o eleele solo ma lapata’ia tagata ina ia nonofo i totonu o fale pe a mafai.
O Coromandel foi o loo iai i le lanu moli i le taimi nei ae ono suia i le lanu mūmū ona o loo faaauau pea timuga mamafa na amata mai le aoauli ananafi.
E faapena foi i vaipanoa eseese o Aukilani nei, o loo iai i le lanu moli ae lē o telē se faatalitalia o le oo i le lapata’iga lanu mūmū.
Peitai fai mai le vaega o le puipuiga lautele a Aukilani, e tatau pea i tagata uma ona nofo tapenapena ne’i oso faafuase’i ni lōlōga, ma ia fai ma siaki i taimi uma tala o le tau i le MetService ma le upega tafa’ilagi a le NZTA.
Puna o Faamatalaga: https://www.rnz.co.nz/news/national/590734/the-regions-next-in-line-for-flooding-as-heavy-rain-heads-south
