I lipoti lata mai a le CNN i le taua i Iran ua faailoa ai o loo faaauau pea feutana’iga i le va o Amerika ma Iran e ui e eseese uma le faamatalaina ane e atunuu e lua o le tulaga o loo iai.
Fai mai le CNN o loo suisui lava faamatalaga a Trump i le matāupu lenei, na ia mua’i faailoa ane o loo aioi ane Iran mo se maliega e faia ae na ia toe faailoa foi i le autusitala i le Fale Pa’epa’e, e lē o popole pe taunuu i se maliega pe leai.
Ua faailoa ane e Isaraelu ua o latou fasiotia le isi ta’ita’i’au a Iran, o ia le isi tagata tāua i le faiga faai’uga e tapunia le Strait of Hormuz.
Ua lipotia foi popolega i aafiaga o le taua lea i tamaoaiga o atunuu aemaise lava foi Amerika, Initia, Saina ma Peretania faapea foi le Atu Europa.
O loo aga’i pea i luga le aofa’i o tagata maliliu i le taua ae ua faaauau foi le mau lu’itau o loo feagai ma Trump i totonu lava ia o lona atunuu.
Faailoa faitioga faasaga i le faigāmalo a Trump mai le House of Armed Services Committee ae i se palota faata’ita’i foi na faia i finagalo faaalia o tagata i le taua ua iloa ai e 59 pasene o tagata e manatu e sesē tele le faai’uga a Trump i le taua lea aemaise o le faaaogāina o le militeli a le atunuu i Iran, 61 pasene e lē fiafia i le faafoeina e Trump o le matāupu ia Iran.
I se tasi lipoti lata mai mai le CNN ua faailoa ai e le alii Peresetene o le a taofia mo le10 aso osofa’iga a Amerika i energy sites a Iran a o faatalia ai le i’uga o talanoaga.
Puna o Faamatalaga: https://edition.cnn.com/2026/03/26/middleeast/us-israel-iran-middle-east-war-day-27-what-we-know-intl-hnk
