O le lona 24 ai lenei o aso o le taua i Iran ma o lipoti aupito lata mai a le CNN ua ta’ua ai le folafolaga faavavave a le Peresetene Donald Trump e faapea o loo faatalanoa nei e Amerika ma Iran le faamutaina o le taua ma ia ta’ua ai foi o le a ia taofia osofa’iga sa fuafua mo nofoaga o le paoa a Iran mo le 5 aso.
Fai mai o lea faasilasilaga a le alii Peresetene ua faia vave mai i le taeaopo ae o ananafi sa ia faamata’u ane ai le pomuina o nofoaga ia o Iran.
Fai mai lipoti o osofa’iga faia pea a Isaraelu ma Amerika ia Iran aemaise foi osofa’iga a Iran ia Isaraelu ma isi tuaoi ua matua’i to’atele ua maliliu ai e aofia ai tamaiti.
Ua faailoa foi i le lipoti lava lea a le CNN, le teena e Iran o se talanoaga ma Uosigitone e pei ona lipotia ane e ofisa faasalalau mai totonu lava o Iran.
Ua lipotia foi le lē fiafia o le Peresetene o Lepanona i osofa’iga a Isaraelu i le itu i Saute o lo latou atunuu, fai mai Lepanona ua solia ai tulafono faavaomalo ma o se osofa’iga ua faia i laueleele.
Peita’i ua lipotia se faamatalaga mai le minisita o le puipuiga a Isaraelu e faapea o le a faavave le faaleagaina o fale i le tuaoi lea i Saute ma Lepanona ma faaleagaina foi ma alalaupapa uma i luga o le Litani River.
Mai le Atu Alapi ua faaleo le lē fiafia o se tasi sui sinia mai le United Arab Emirates aga’i i isi ta’ita’i o atunuu Alapi i le leai o se lagolago e tuuina ane mo atunuu Alapi i le Faga i Peresia i taimi o loo matua’i mana’omia ai le fesoasoani.
O loo aga’i pea i luga le tau o le suāuu a o tālia ai se isi lipoti mai faatalanoaga e pei ona lipotia i le va o Amerika ma Iran pe moni pe leai.
Puna o Faamatalaga: https://edition.cnn.com/2026/03/22/middleeast/us-israel-iran-middle-east-war-day-24-what-we-know-intl-hnk
