I se vaaiga lata mai i le taua i Iran ua faailoa mai i lipoti a le CNN ua faamanino ane e Iran o le a mamafa lo latou tali ane i ni osofa’iga e faia e Amerika i nofoaga o le paoa i Iran ae ua lapata’i ane foi Tehran afai ae tula’i mai lea tulaga o lona uiga o le a matua’i faaleagaina le si’omaga i lea itu o le atunuu.
O faamatalaga na faia a Trump ua ta’ua ai o le a ia poloa’ia le pomuina o ia nofoaga pe afai e le tatalaina le Strait of Hormuz i totonu o le 48 itula.
Ua faailoa le lē fiafia o le Palemia o Isaraelu i osofa’iga a Tehran i se vaega e nofoia e tagata i le itu i Saute o le aai o Arad i Isaraelu lea e faapea na manunu’a ai tagata e to’a 84, o isi e matua’i tigāina.
Ua ta’ua foi i lipoti le faailoa o le lē fiafia o le United Kingdom i osofa’iga a Iran sa faia aga’i i le Vasa Initia i se nofoaga faamiliteli mo Amerika ma le UK.
Ua fesiligia ai e nisi poo le ā tonu le malosi o iai agavaa faamiliteli o Tehran ma le mamao e mafai ona oo iai le fanaina o ana missiles.
O mea uma ia o loo tutupu a o faaauau ai pea ona siitia le tau o le suāuu i le mae’a ai ona faailoa e Iran o le a tapunia pea le Strait of Hormuz.
E iai isi lipoti lata mai ua ta’ua ai o loo faatalanoa e Trump ma Kier Starmer, Palemia o Peretania le mana’oga o le toe fia tatala o le Strait of Hormuz.
Puna o Faamatalaga: https://edition.cnn.com/2026/03/22/middleeast/us-israel-iran-middle-east-war-day-23-what-we-know-intl-hnk
